EGIAN EUSKARAZ

Lutxo Egiak hasitako bideari jarraitu diote Donostiako Egia auzoan: euskara hutsean bizitzeko ahalegina egin dute berrehun lagunek baino gehiagok, astebeteko txandatan. Larunbatean amaituko da egitasmoa, Egia Euskaraz egunean, eta beren esperientziak bilduko dituzte.
Berria, 2016-martxoa-10:
http://www.berria.eus/paperekoa/1812/038/001/2016-03-10/nork_darama_zama_bizkarrean.htm
Egian Euskaraz bizi nahi dugulako:
https://egianeuskaraz.wordpress.com/

Euskaraz bizi nahi duenak badu halako pisu astun bat soinean, nahi edo ez nahi, euskararekin batera beste hizkuntza bat ere badagoelako lurralde berean...Eta ez zaio hain erraza euskaldunari bere hizkuntza nahi adina erabiltzea...
Batek baino gehiagok uste zuen oso euskalduna zela. Euskaraz egiten zuela ia bizimodu guztia. Baina astebetez horretara jarri ostean, konturatu dira ez dela horrela. «Normalean familian, bikote harremanean, eta lanean euskaraz egiten dut, baina oso erraz aldatzen dut erdarara...Andoni Altuna Trebeska dantza taldeko kideak honako hau ondorioztatu du: «Esperientzia horrek balio izan dit konturatzeko zenbat egoeratan egiten dudan erdaraz, euskaraz egin dezakedanean»...
Baina buruak kaleak baino oztopo gehiago jartzen dituela ohartu da Urrusolo: «Txipa aldatzea kostatu zait gehien, eta ez hain erraz erdarara jotzea. Baina ikusi dut uste baino errazagoa dela hainbat egoeratan euskaraz egitea...
 Euskaraz badakiten arren betidanik gaztelaniaz hitz egin duten pertsonekin egin zaie zailena euskaraz aritzea...

Posible da bi hizkuntzatan?
Euskaraz ulertu arren, hitz egiteko gai ez direnekin elkarrizketa elebidunak izatea posible dela frogatu dute. «Nik harakinarekin egiten dut euskaraz. Berak esplikatzen dizkit bere pena guztiak erdaraz; baina nik dena euskaraz esaten diot, eta berak galdetzen dit: 'Zerbait gehiago?' Kopurua eta horrelako hitzak esaten ditu euskaraz. Orain arte ez zuen hori egiten, eta hasi da gauzatxo batzuk euskaraz esaten. Eta niri aukera ematen dit nire hizkuntzari eusteko», esan du Gurutzeagak...
Baina espero ez zuten moduan, jarrera ona agertu dute ingurukoek: «Pentsatzen duzu beti jarrera ezkorra edo tentsioa sortuko duzula, baina ez da hori gertatzen», azaldu du Gurutzeagak...«Gauzak esateko modua inportantea da. Irribarre batekin baldin bada, besteak ez du sentituko eraso bat denik», erantsi du Gurutzeagak. Lauretako inork ez du erreakzio txarrik jaso astebeteko esperientzian...
Euskaraz ulertzen ez duen jendearekin asko korapilatzen da kontua. Amore eman daiteke? Baiezkoan da Urrusolo. «Hizkuntza komunikazio tresna bat da. Komunikazio hori hausten bada, ez du ezertarako balio nik nireari eusteak; ez da komunikaziorik egongo, eta hizkuntzak ez du zentzurik». Kasu horietan, kaixo, agur, eskerrik asko eta halako hitzak solasaldian txertatzea garrantzitsua dela uste dute. Altunaren iritziz, modu horretan, «hizkuntzaren presentzia» ikusten dute erdaldunek...
Ez dakitenek euskara ikasteko pauso handia eman behar dute. Baina dakiten horiek erabiltzen badute, kutsatze prozesu bat gertatzen da...
Taldekako elkarrizketetan nola jokatu izaten da eztabaidaren beste adar bat, euskara ulertzen ez duen norbait dagoenean. Bornaetxeak uste du baten presentziak ez duela baldintzatu behar gainontzekoen joera. «Guztientzat zerbait esan nahi baduzu bai, baina taldeetan azkenean ez da beti denontzat hitz egiten. Eta berak ikusten badu zuk elkarrizketa berean bati euskaraz eta besteari gaztelaniaz egiten diozula, ez du uko egingo»...

Badaki edo ez daki?
Sarritan gertatzen da, norberak uste duela aurrean duenak ez duela euskara ulertzen. Eta kasu horietan, erosotasunaren alde egiten da: gaztelaniaz egiten da lehen hitza...Urrusolo konturatu da ez saiatzeagatik euskarazkoak izan zitezkeen zenbat solasaldi egin dituen gaztelania hutsean: «Askotan eduki dut parean euskalduna zen norbait, eta ez naiz konturatu ere egin euskalduna zela, ez dudalako euskaraz egin hasieratik...
Guztiak ohartu dira erdarara jotzeko ohitura dutela, eta, Bornaetxearen iritziz, hori onartzea da lehen pausoa. «Drogazalea zarenean, egin behar duzun lehenengo gauza da onartzea. Onartu gaztelaniaz hitz egiten duzula. Lasai, normala da, jende askori pasatzen zaio... Eta hortik aurrera hasi»...
Astebete horretan ikusi dute zer esfortzu eskatzen dien euskaraz bizitzeak, baina baita horrek zer ematen dien ere. «Proba egin, eta ondo ateratzen zaizunean, poz horrekin ateratzen zara, eta hurrengoan bizkar zorroa ez dago hain kargatuta...
Jende askok eta askotarikoak parte hartu du egitasmoan. Baina eragile guztiek ez dute euskararekiko harreman bera. Horregatik, larunbateko jaian egingo duten Kalakategiak funtzio jakin bat du: partaideek esperientziak partekatzea, eta beren beharrak zeintzuk diren azaltzea. Horrela, aurrera jarraitzeko oinarri bat izango dute antolatzaileek. Bigarren fasea etorriko baita orain: eragileen lanketa...Baina ez da larunbatean amaituko kontua, beste herri eta elkarte batzuek agertu baitute gauza bera egiteko interesa.

BA...BAI - 12. egunpasa

12 BA..BAI kide batu ginen atzo gure 12. topaketa egunean: Josune, Maria Luisa, Maribi, Ani, Marije, Juan Kruz, Mari Jose, Mari Karmen, Jon Etxebarria, Jon Gorroño, Fernan Bilbao, Fernando Garate.

Auzokoa tabernan alkartu ginen erdiak edo 12:00etan; gero Bakeder tabernara eta Arrien tabernara bidean besteak be agertuz joan ziren, dozenea osatu arte. Hori bai, tragotxoen artean kontu ugari izan zan gure artean. 

Harizpe txokora ordu biak inguruan iritsi ginen eta bazkaltzen hasi aurretik azken prestaketak egin genduzan: entsalada prestatu, ogia txikitu eta ardaua mahaira atera. Dana prest egoanean, mahaiaren inguruan Euskeraz bizi ta tinko / hango eta hemendiko / topa dagigun eta bakean / bizi gaitezen betiko abestuz emon geuntsan hasiera bazkariari: entsalada, mina piper gorriekaz, turroizko izozkia, palmeritak eta kafea.  Guzti honeri, bakoitzak gainezka geunkan umorea eta alkarregaz ondo pasatzeko gogoa gehituz, dana ondo: berbea ugari izan zan gure artean, umorea, ironia eta seriotasuna txandakatuz. Jan eta kafeak hartu bitartean bakoitzak bere ingurukoekaz ekin eutsan berbaz eta berbaroa etenbakoa eta animatua izan zan. 

Ondoren kontuak egin eta hurrengo topaketa eguneko zehaztasunak erabaki genduzan: zezeilaren/otsailaren 20an (egun horretan Berbalagunen txangoa egongo balitz 27an) Kolakañe txokoan edo Bake Leku txokoan.

Gero talde gogoeta eta elkarrizketari ekin geuntsan eta honelako kontuak erabili genduzan:

- Denda eta supermerkatuetan zerbitzari euskaldunek erosketaren kostua erderaz botatzen dabenetan, batek erabilitako estrategia: “zer?, zenbat esan dozu?….”

- Iruñan ume bati euskeraz egin eutsalako, haren amak agertu eutson esker ona kontatu eban beste batek.

- Kioskoan Berria egunkaria eskatzeagaitik edota berarekin ikusteagaitik izandako pozezko hitzak eta agurrak aipatu ebazan beste batek.

- Lutxo Egiak Bilbon izandako esperientzia (euskeraz baino ez egitea eta besterik ezean ingelesez) komentau gendun. Era guztietako erantzunak (positiboak eta negatiboak ere bai) izan  ei ebazan, baina bere asmoa jenteari euskeraz egiteko aukera emotea izan zala eta askok hori eskertu egin ei eutson; hori bakarkako esperientzia izan zala baina esperientzia kolektiboa izan beharko litzakela eta horretan eragiteko asmoa daukala be esaten eban Lutxok, bere esperientzia kontatzerakoan.  Horren harira lehenengo berbak beti euskeraz egitearen garrantzia azpimarratu zan, nahiz eta Bilbon izan; sorpresa atseginak izaten dira sarritan taldeko batek esan ebanez. 

- Sarritan kanpotarrek (oraingo etorkin berriek) bertokoek baino euskerarekiko jarrera hobea agertzen dabela be esan zan: dakiten apurra egin, iragarkiak euskeraz... Eta horren adibide konkretuak be emon ziran.

- Gure lagunartera jente gehiago gonbidatzeko posibilitatea be aipatu zan. Kasu honetan jadanik gagozanen eta barrien artean talde bi osotu beharko litzakezala komentatu zan, ostantzean egiten doguzan mahai inguru mamitsu eta atseginak izateko larregi izango ginalako. Eta esan zan baita be, ahal dala, topaketaren hasieratik danok egotea izango litzakela onena, inguruan dabiltzanek ikusi gagiezan eta zergaitik batzen garen jakin dagien.  

Seirak eta pikuan emon geuntsan amaiera gure txokoko topaketari, baina gehienok AMAMA filma ikustera joan ginen, holan gure egunpasari jarraipena emonez: filma danori gustatu jakun, urtekeran komentatu gendunez. Euskeraz be era askotako produkzio ona dago eta hori ikusteak poztu egiten gaitu eta aurrera egitera animatu.  

Gernikan, 2015eko urriaren 18an

EUSPOZ - 13. EGUNPASA

2015ko urriaren 14an Loli, Matxalen, Mari Karmen, Lore, Gabriel, Juan Kruz, Marije,  Ani, Juan Luis, Mikel Garmendia, Pilare, Karmelo eta Garbiñe izan ginen  EUSPOZen 13. egun pasan. Garbiñe eta Karmelo lehen aldiz etorri ziren. Ondo etorriak!

12:00tan alkartu ginen Galdarapekon eta alkar agurtu eta mahaiaren inguruan jarri ondoren, gure alkarrizketa atseginari ekin geuntzan. Lagunartearen egitasmoari errepasoa emon ostean, toki izen batzuk aireratu ziren, haien jatorri posiblea aipatuz:

Kurubio Landa: guda biko landa.

Hiri Ortu ( Huertas de la Villa): Bilboko hiri ondoko ortuei aipamena eginez.

Ordoki Iturriaren jatorria: hor dok iturria.

Urruzulo: urre zilo.

Kimera?

Matxuratutako komunean ikusitako karteltxoa ere berbagai izan gendun: komun hau matxinatuta dago.

Bestalde gutako batek entzundako honek be zeresan ugari sortu eban:

- “Zein dok euskerarik  onena?”. – “Herriak egiten dauena”

Alaba nagusiak aitari esandakok eta honen erantzunak be izan eben berbabidea:

- “Aita, Unaik eta Ikerrek erderaz eiten deurie plazan”. – “Erderaz be nonon ikesi behako deurie”.

Lutxo Egiaren esperientzia interesgarria (Bilbon hilabetez euskeraz bizitzea) be komentatu genuen.

Honeek eta beste kontu ugari erabili genduzan bazkal aurretik, bazkaldu bitartean eta ondoren.

Ordu biak aldera hasi ginen bazkaltzen, Topa dagigun zutunik abestuz eta basuak eskuetan txin-txin eginez. Bazkaldu ondoren Pilarek topaketarako beren beregi prestatutako bertsoak eta Juan Luisek eroandako Imanolen Ilun ikarak abeste genduzan, eta baita gure liburuxkako beste pare bat abesti ere.

Azkenik hurrengo topaketako eguna adostu genuen: 2016ko zezeilaren (otsailaren) 10.

Ni bostak aldera irten nintzen baina beste batzuk oraindik han jarraitu eben tertulia goxoan.

Topaketari buruz lagunarteko biren mezuak jaso ditut eta hau dinoe:

“Atzokoa lagunarte ederra…”

“Atzo gustura ikusi nuen jendea, amaitu ondoren egindako komentarioen arabera”

"Egun borobila izan zen. Lehenago alde egin nuen, baina penatxuegaz"

Muxikan, 2015eko urriaren 10an

“EUSPOZ”

1) Uda pasatu eta

betikoan sartu,

nagikeriak utziz

zama denak hartu,

zoriontsu garela

gaitezen ohartu,

lagunarte ederra

inguruan gertu.

2) Kontakizun unean

hauxe da nirea,

Lutxo Egiak digu

indartu fedea,

froga egin nahi zuen

erdera gabea,

Bilbon euskara hutsez

bizitzeko aukera.

3) Froga garrantzitsua

ausardia behar,

ondorio ederrak

euskarari ekar,

ereduari atzetik

jarraitzea dakar,

Euspozen izenean

eskerrak iragar.

4) Bilboko jai ederrak

Santiago plazan,

Euskal giroa gozaz

euskaltzale gisan,

Euskal mundo txiki bat

Bertsoen gerizan,

Bilbo kantari-dantza

Euskaldunen trazan.

5) Tere gure laguna

OMAkoa sortzez,

Euskal amerikarrei

egitera oles,

aberkide ditugu

ezin ahaztu errez,

bertan bizitakoa

kontatu mesedez.

6) Euskararen bideak
bistan urtez-urte,

Jaurlaritza tarteko

aztertu dituzte,

irakurri ondoren

zer duzue uste?

papel kontuak baino

erabili fuerte.

7) EUSKERAZ BIZI nahirik

zabalduz ahoa,

denak eskertu gabe

hemendik ez noa,

eskerrik beroena

denongana doa,

ANIri bereziki

nire esker ona.

Pilare Baraiazarra

Ilun ikarak

Imanol

Ilun-ikarak azken argia
uxatu dizu urrutira,
zeru sabaian izar bakanak
itzal etzanei begira,
ilun-txintako sorgin-usaiak
espazioan dirdira. (bis)

Mendi-hegitan argi-oroitza
eguzkiaren keinua,
baso beltzean hosto firfira
gauezkoen erreinua,
itsasondoko tamarindotan
olatuen errainua (bis)

Itsas txoriak txio-txioka
harat-honata haizetan,
berde argien edertasuna
more motelduz uretan,
txalupa geldi kulunkarien
isladarekin hizketan. (bis)

Parke isileko banku txuria
ezpain beroen lankide,
antsi zaharrak zantzu berritan
bihotz gordinen senide,
tristura hegan paseatzen da
arratsaren solaskide. (bis)

Gau-ezkilaren oihartzun-hotsa
irristatzen da kolkoan,
zirrara mutu baten gisara
maitearen soinekoan,
bakardadea sekretuekin
korapilatzen den zokoan. (bis)

Itsas aireak gesalez dakar
murmuriozko solasa,
suspiriotan ezin jarioz
pena lurrinduen hatsa,
haize-boladak txikordatzen du
maiteminduen jolasa. (bis)

BA...BAI-EUSPOZ - 2. egunpasa

Atzo, ekainak 6, BA…BAI eta EUSPOZ lagunarteak batera alkartu ginen; guztira 20: Jon Etxebarria, Juanita, Mikel Garmendia, Tere, Karmelo, Mari Karmen Goiriena, Marije, Jon Enbeita, Jose Agustin, Matxalen, Loli, Juan Kruz, Jon Gorriño, Mari Karmen Gainza, Maribi, Ani, Jose Luis, Josune, Mikel Arginarena eta Mari Jose.

12:00ak bueltan Auzokoako terrazan joan ginen batzen; han alkar agurtu eta  Itsas Mendi txakolin bikaina daztatuz kontu kontari ekin geuntsan ordu bete inguruan. Gero Gernikako plazatik egin gendun bueltatxo bat, hango hilaren lehen zapatuko merkatuaz gozatuz. Eta ordu biak inguruan hartu gendun Omarako bidea. Benetan paraje ederra Omako harana!!

Aldi baten auzo eskola izandako eraikineko txoko dotore eta txukunean izan gendun bazkaria: barazki krema, bakailoa (bizkaierara eta pil-pilean), eta postrerako gazta eta menbrillua. Hasteko zutunik eta errioxar ardoz betetako edalontziak eskuan topa egin gendun (Euskeraz bizi ta tinko / hango eta hemendiko / topa dagigun eta bakean / bizi gaitezen betiko) eta jarraian lasai lasai jarri eta jateari ekin geuntsan, umore onean eta lagunarte atseginean gure kontutxoak alkarri kontatuz.

Kafeak hartu ondoren, diru kontuak egin eta hurrengo topaketen datak ipini genduzan: EUSPOZekoak urriaren 7an eta BA…BAIkoek urriaren 17an. Gero kantuari ekin geuntsan: Pilarek bialdutako bertsoak, Jon Enbeitaren abestiak eta gure liburuxkako beste batzuk. Amaieran Jonek bere azken CDaren ale bat zozketatu euskun.

5ak aldera inguruko paraje ederra eta hango etxe dotoreak ikustera urten ginen, Tereren azalpen interesgarriek eta gure arteko berbaro gozoak hango ixiltasunari bizia emoten eutsela. Inguru baketsua da benetan be ha, baina ez abandonatua eta bertan behera itxia, ondo eta gustu handiz zainduta eta txukun dagoz hango inguruak eta.

Azkenik 7:30 inguruan emon geuntsan amaiera gure egunpasa zukutsuari, musu eta besarkaden artean alkarri zorterik onena opatuz eta hurrengoan barriro alkartzeko gogoz.

Jose Luis argazkiak

2015eko ekainaren 7an

BERTSOAK

Pilare Baraiazarra

1) Euskaltzale lagunok

agur bero bana,

pozik etorri gara

bagenuen afana,

harremanen giroa

bakoitzak darama,

elkarren inguruan

pena denak sana,

euskaraz mintzatuaz

gozatuz ahal dana.

2) Oroitzapen ederra

kantu eta kontu,

talde honek badu ta

dohain eta gustu,

euskalgintza bideak

markatu ta orraztu

Euskara maite eta

Aberria  marraztu

Independientziak gu

askatu eta  poztu.

3) EUSKARAz  BIZI nahirik

sortu zenbait talde,

herri zein hirietan

koka aldez alde,

edadeko askotxo

gazteriak alde,

erderaz aritzeak

euskarari  kalte,

españolak al dira

egiten dut galde.

4) Trasmisioz gugana

Iritsi da  altxorra,

Ondorengoei  berdin

guk egin beharra,  

Hizkuntza ederra da

egin barra-barra,

nortasun kontua da

aberri giharra,

gure-geurea data

bitxi eta zaharra.

5) Mahaiaren inguruan

ederra giroa,

ANIk gidatu eta

berotu gogoa,

bidea erraztuta

taldea badoa,

topa egin dezagun

gozatu tragoa,

berriro elkartzeko

bada motiboa.

ABESTIAK 

Jon Enbeita

ASKATASUNA, BAKEA  

       Askatasuna omen da

gizakion bereizgarri

Portaerak ikusita

ezin da asko igarri

Diru eta botereak

bihurtu dute lokarri,

geurea nahiko ez eta

inorenaren egarri

Segurtasun aitzakian

gero hesiak ezarri

Loturak ezin lezake

askatasunik ekarri

Askatasunak behar du

errespetoa oinarri

Norbera norbere jaube

norbanako zein aberri

 Arazoa konpontzeko

bakea omen da giltza

Bakerik ez den artean

ezin omen gara mintza

Bakearen aitzakian

ukatzen badugu hitza,

iruzurrezko bake bat

arma bihurtzen gabiltza

Bakea ondorio da

bakea ez da premisa

Bakea landu behar da

bakea ez da baldintza

Bakea da justizi ta

maitasunaren emaitza

Sustrairik sartu ezean

ez da loretzen  zuhaitza

AMETSAK BIZI GAITU                      

“Ametsak amets omen ditugu.

Ezin da bizi euren gatigu.”

Kondairan zehar “ilustratuak”

hala mintzatu zaizkigu.

Benetakotik ametserako

marra non den al dakigu?

Zer kalte egiten digu?

Zerbait amesten dugun artean

ilusioa darigu

Usteak haina ezuste dantzan 

ilusioen merkatu plazan.

Kontuan hartu zer jartzen dugun

erosketako balantzan.

Egunen baten, gure ametsak,      

landare berrien gisan,

egi bihurtu daitezan,

amesten dugun egia bera

ez bedi ametsa izan.

Ametsa, gazte, ez da bekatu,

eta ez gorde edo lotsatu,

berak ez zaitzan, lagundu orde,

bakardadera bultzatu.

Aire garbiaz kutsatu dadin,

barne itxitik askatu,

bihotz hurkoan pausatu;

bik konpartitzen duten ametsak

mundu bat balio baitu.

Gizatasuna dugu biluzik.

Norgehiagokak ez du bihotzik.

Pausurik ezin aurrera eman

beste bat zapaldu ezik.

Mundu berri bat maite duenak,

aurkituko badu pozik,

ezin du ito ametsik.

Ametsa ez da ihes laguna

bidaia laguna baizik

Aseen lepo eta  buskentzak,

goseen azal eta saihetsak...

Egile jaunak ez ditu josi

behar bezala zumetzak.

Baiezkorako grina sor dezan

eguneroko ezetzak,

eraiki behar defentsak.

Amets ostean ez ezkutatu,

baina ez utzi ametsak

Nor da laguna? Nor da etsaia?

Nora dihoa mundu deslaia?

Nork ez du noizbait amestu izan

justiziaren garaia?

Biblian ere sortu ziguten

“Josafat”eko zelaia,

egizko azken epaia;

lur berri baten ametsa baita

sinesmenaren sustraia

Beti borrokan, beti jo ta su,

alperrik ote hura, ni ta zu?

Ilargia jan badizu gauak,

izarrak sobran dituzu.

Dena utopi bihurtzen bada,

esperantza bera kasu,

jaiki beharra daukazu.

Utopia ez amets bihurtu,

baina amestu ezazu.

Baina aurpegi hori alaitu,

gauak ilargi gehiago baitu.

Ez dezazula egunsentia

laino beltzetan bahitu.

Nahi zenukena amestu eta

lortzeko lehian jarraitu,

horrek berpiztuko zaitu.

Bizitza, gazte, ez da ametsa,

baina ametsak bizi gaitu.

GUNTZURRI  ETA  SASI

     

Iraganeko sukalde bero

ohituren kabi epela

gaur hiru horma erdi jausiak

hotz eta hutsik sabela

Garai bateko teilatu orde

zerua dozu txapela

Lehen danak zeuri begira eta

gaur nork daki hor zarela ?

Sasiak ditu bideak itxi

zelaian pinuak jeiki

Oroitapenak bakardadean

itotzen doaz  emeki

Guntzurria da bakarrik zugaz

zeure minaren erruki

berari esker hormak dituzu

gaur arte zutunik euki

GUNTZURRI  ETA SASI

NAHI ETA EZIN BIZI

IRAGANAREN BIHOTZ

BAKARDADEAN HILOTZ

Agur goizeko kukurrukuak

haur jolas eta zantzoak

behien morrosak, txakur ausiak,

“aida”, “arre” eta “iso”-ak

ebakitako bedar usaina

tximiniko ke lausoak...

Zeugaz batera irentsi ditu

zeurea zendun basoak

  

GUNTZURRI ETA SASI........

ENE HERRIA, ZEURI                                    

(Atzerrian bizi diranai eskainia)

Ene Herria, zeuri

naukazu kantari

oroimenen artean

Bihotzaren sari

malkoak dantzari

bi begien atean

Arimak iragan

gura leukez  hegan

         mendi ta itsasoa

ta dastatu zeugan

antxinako eran

         kabiaren gozoa

Egun ilun baten

bideratu ginen

itzultzeko asmotan

baina bizitzaren

kateak nabarmen

lotzen gaitu askotan

                            nahiz ta zor dautsagun

                            izatea lagun

                                      herbesteko lurrari

                            bihotzak hain urrun

                            zu gabe ezin iraun

                                      gure ama Euskadi

Agur

asaben herria

beti berria

Agur

lur sakratua

askapen kantua

Zugan

gura geunke atseden

   amesen berora

   munduko denbora

amaitu baino lehen

AI, AI, DIRUA

AI, AI, AI DIRUA BAI

AI, AI, AI DIRUA BAI

DIRUA EZKERO UGARI,

AGUR MARI ANTONI

Dirua behar geunke jarri aldaretan

santuen ordezkari, euren lekuetan

ez bait dau inork eiten zeru ez lurretan

harek haina mirari gure egunetan

AI, AI, AI DIRUA BAI

AI, AI, AI DIRUA BAI

DIRUA EZKERO UGARI,

AGUR MARI ANTONI

Mutuak deitzen deutso, itsuak ikusten

esku bakoak dabiltz bera harrapatzen

Hamaika debotok, diruaren truke,

Jainko ta zerua salduko lituzke

AI, AI, AI DIRUA BAI

AI, AI, AI DIRUA BAI

DIRUA EZKERO UGARI,

AGUR MARI ANTONI

Prakak galduteak nori ardurako

mila pezetako bat azpian baleuko

Kakak egingo baleu diru edo urria

zulorik barik geunke pobreok ipurdia

AI, AI, AI DIRUA BAI

AI, AI, AI DIRUA BAI

DIRUA EZKERO UGARI,

AGUR MARI ANTONI

DIRUA EZKERO UGARI...

ZURI BEGIRA EZ NAGO NI

HOTZAK JO DAU AZAROAN 

(Aita Balendinen heriotzean egindakoak)

Maiatzak jantzi eban lorea

hotzak jo dau Azaroan

Aberri honen malkoa ez da

lehortuko luzaroan

Iraupenaren txori kantari

zigor garratzen aroan

Izarrak ere negarrez ditu

egunsentiko garoan

ikusiz zelan heriotzeak

erruki barik daroan.

Bake egarria, Egi gosea

eta Maitasuna gori,

gizon batengan eztitu eta

zeu zindugun gizon hori.

Etsaien esku igaro arren

mila neke ta histori,

barkatzeko prest, lanean tinko,

askatasunaren txori,

Bihotz haundien irakatsia

emon deuskuzu danori.

Baina auzian bazan euskara

edo euskaldun lurmena,

borrokarako izango zinan

gudarietan aurrena.

Ezetza ez zan inoz entzungo

zure ahotik urtena.

Abertzaleok egin ezkero

bakotxak zure laurdena,

laster litzake, barriz, geuretzat

aske asaben lur dena

Bihotza goruntz ihesi guran,

begiak malkotan guri,

ilargiaren argi leunera

begira gaituzu zeuri

Hainbeste izar hori artean

bada bat garbi ta zuri.

Beheko artzaina bihurtu zara

izarretako axuri.

Herri honengan zendun fedea

arren gugana isuri.